നാടു മുഴുവന്‍ ഒലിച്ചുപോയിട്ടില്ല; ഒരു പഞ്ചായത്തിലെ മൂന്ന് വാര്‍ഡുകളാണ് തകര്‍ന്നത്; വയനാട് ദുരന്തത്തെ നിസ്സാരവത്കരിച്ച് വി മുരളീധരന്‍
തിരുവനന്തപുരം: വയനാട്ടില്‍ ഉണ്ടായ ഉരുള്‍പൊട്ടലിനെ നിസ്സാരവത്കരിച്ച് മുന്‍ കേന്ദ്രമന്ത്രിയും ബിജെപി നേതാവുമായ വി മുരളീധരന്‍. വയനാട്ടില്‍ ഒരുനാട് മുഴുവന്‍ ഒലിച്ചുപോയി എന്നുപറയുന്നത് ശരിയല്ലെന്ന് മുരളീധരന്‍ പറഞ്ഞു. ഒരു പഞ്ചായത്തിലെ മൂന്ന് വാര്‍ഡുകള്‍ മാത്രമാണ് തകര്‍ന്നത്. വൈകാരികമായി സംസാരിക്കുന്നതില്‍ അര്‍ഥമില്ലെന്നും മുരളീധരന്‍ തിരുവനന്തപുരത്ത് നടത്തിയ വാര്‍ത്താസമ്മേളനത്തില്‍ പറഞ്ഞു. തെരഞ്ഞടുപ്പിലെ ബിജെപി മുന്നേറ്റം തടയുന്നതിന് വേണ്ടിയാണ് വയനാട്ടില്‍ ഇന്ന് എല്‍ഡിഎഫും യുഡിഎഫും ഹര്‍ത്താല്‍ പ്രഖ്യാപിച്ചതെന്നും മുരളീധരന്‍ പറഞ്ഞു.
സംസ്ഥാന സര്‍ക്കാരിന്റെ കൈയില്‍ പണമിരിക്കുകയല്ലേ?. അത് വയനാട്ടില്‍ ചെലവഴിച്ചൂകൂടെയെന്നും മുരളീധരന്‍ വാര്‍ത്താ സമ്മേളനത്തില്‍ ചോദിച്ചു. ഒരു നാട് മുഴുവന്‍ ഒലിച്ചുപോയി എന്നു പറയുന്നത് ശരിയല്ല. വയനാട്ടിലെ ഒരു പഞ്ചായത്തിലെ മൂന്ന് വാര്‍ഡ് മാത്രമാണ് ഒലിച്ചുപോയത്. നാടു മുഴുവന്‍ ഒലിച്ചുപോയിട്ടില്ല. പണം ചെലവാക്കണമെങ്കില്‍ സര്‍ക്കാര്‍ ഖജനാവില്‍ നിന്ന് അതിന് അതിന്റെതായ രീതികളുണ്ടെന്നും മുരളീധരന്‍ പറഞ്ഞു.
