നടപടി കടുപ്പിച്ച് മോട്ടോർ വാഹനവകുപ്പ്; യാത്രക്കാർ പറയുന്ന സ്ഥലങ്ങളിലേക്കു കൃത്യമായി സവാരി പോകാത്ത ഓട്ടോറിക്ഷൾക്ക് ഇനി വിലങ്ങ് വീഴും

ഓട്ടം വിളിച്ചാൽ പോവാത്ത ഓട്ടോറിക്ഷകൾക്ക് വിലങ്ങ് വീഴുന്നു. ചെറിയ യാത്രകൾക്ക് വിളിച്ചാൽ വരാൻ കൂട്ടാക്കാതെ ഓടി മറയുന്ന ഓട്ടോറിക്ഷക്കാർക്കെതിരെ നടപടിയുമായി മോട്ടോർ വാഹന വകുപ്പ്.

യാത്രക്കാർ പറയുന്ന സ്ഥലങ്ങളിലേക്കു കൃത്യമായി സവാരി പോകാത്തവരുടെ ലൈസൻസ് റദ്ദാക്കുന്നതടക്കമുള്ള നടപടി സ്വീകരിക്കാനാണ് മോട്ടോർ വാഹനവകുപ്പ് തയാറെടുക്കുന്നത്. യാത്രക്കാരൻ പറയുന്ന സ്ഥലത്തേക്കു സവാരി പോകാൻ ഓട്ടോ ഡ്രൈവർ വിസമ്മതിക്കുകയാണെങ്കിൽ വാട്‌സാപ്പിലൂടെ പരാതി നൽകാം. ഓട്ടോറിക്ഷയുടെ നമ്പർ 8547639101 എന്ന നമ്പറിലേക്ക് വാട്‌സ് ആപ്പ് ചെയ്യുകയോ kl10@gmail.com എന്ന ഐഡിയിലേക്ക് മെയിൽ ചെയ്യുകയോ ചെയ്യാം. ഏതു ജില്ലയിൽനിന്നും ഈ നമ്പരിലേക്ക് വാട്‌സാപ്പ് സന്ദേശം അയയ്ക്കാം. ഈ നമ്പറിൽ ലഭിക്കുന്ന പരാതികൾ ജില്ലകളിലേക്കു കൈമാറി അപ്പോൾ തന്നെ നടപടി സ്വീകരിക്കുമെന്നു ട്രാൻസ്‌പോർട്ട് കമ്മിഷണർ കെ. പത്മകുമാർ ഐപിഎസ് പറഞ്ഞു. 24 മണിക്കൂറിനുള്ളിൽ നടപടിയുണ്ടാകുമെന്നാണു വകുപ്പ് പറയുന്നത്.

ഓട്ടം വിളിക്കുന്ന സ്ഥലത്തേക്കു പോകാതെ ഓട്ടോക്കാർക്കു താൽപര്യമുള്ള സ്ഥലത്തേക്കു മാത്രം സവാരിപോകുന്നതായി പരാതികൾ വർധിച്ച സാഹചര്യത്തിലാണു നടപടി. മീറ്റർ ഇടാതെ യാത്ര ചെയ്യുന്ന ഓട്ടോറിക്ഷകൾക്കെതിരെയും കർശന നടപടിയെടുക്കാനാണ് വകുപ്പിന്റെ തീരുമാനം.