മാഹി: പള്ളൂർ നോർത്ത് ഗവൺമെൻ്റ് ലോവർ പ്രൈമറി സ്കൂളിൽ സംഘടിപ്പിച്ച ‘ഗുണാത്മക രക്ഷാകർതൃത്വം’ ബോധവല്ക്കരണ ക്ലാസ്സ് ശ്രദ്ധേയമായി.
തലശ്ശേരി ട്രാഫിക്ക് പോലീസ് സബ് ഇൻസ്പെക്ടറും കൗൺസിലർ സൈക്കോളജിസ്റ്റും യോഗാധ്യാപകനുമായ സുനിൽകുമാർ പൊയിൽ രക്ഷിതാക്കൾക്കുള്ള ബോധവല്ക്കരണ ക്ലാസ്സു നയിച്ചു. കുട്ടികളുടെ സ്വാഭാവ രൂപീകരണത്തിൽ ഗൃഹാന്തരീക്ഷത്തിനുള്ള പ്രാധാന്യം വർധിച്ചു വരുന്ന സാഹചര്യം രക്ഷിതാക്കൾ തിരിച്ചറിയണമെന്ന് അദ്ദേഹം പറഞ്ഞു. താരതമ്യം ചെയ്തും പരിഹസിച്ചും പരീക്ഷയിലെ മാർക്കിനെ ചൊല്ലി കുറ്റപ്പെടുത്തിയും കുട്ടികളെ മനസികമായി തകർക്കുന്നത് ശരിയല്ലെന്നും പ്രായഭേദമില്ലാതെ അവരെ കേൾക്കാനും അംഗീകരിക്കാനും ചേർത്തു നിർത്താനും സ്നേഹം പ്രകടിപ്പിക്കാനും നമുക്ക് കഴിയണമെന്നും അദ്ദേഹം രക്ഷിതാക്കളെ ബോധ്യപ്പെടുത്തി. പ്രധാനാധ്യാപിക റീന ചാത്തമ്പള്ളി അധ്യക്ഷത വഹിച്ചു. അധ്യാപക രക്ഷാകർതൃ സമിതി പ്രസിഡന്റ് സി. സജീന്ദ്രൻ ആശംസകൾ നേർന്നു. ആർ. രൂപ സ്വാഗതവും പി.ടി.മുഹ്സിന നന്ദിയും പറഞ്ഞു. കെ.ദിൻഷ , എസ്.എം.സി. ചെയർപേർസൺ പി.കെ. നജിഷ, മാതൃസമിതി അധ്യക്ഷ ചാത്തോത്ത് തഫ്സീറ, പ്രകാശ് കാണി തുടങ്ങിയവർ നേതൃത്വം നല്കി.
