പാനൂർ:ശ്രീകൃഷ്ണ ജയന്തി ദിനത്തിൽ നാട് അമ്പാടിയായി മാറി. പാനൂർ മേഖലയിൽ 7 ശോഭായാത്രകൾ നടന്നു. കൃഷ്ണന്മാരും രാധമാരും ഗോപികാനൃത്തവുമായി വീഥികൾ വർണ്ണാഭമായി. ശോഭായാത്രയിൽ കൃഷ്ണ വേഷങ്ങൾ അണിഞ്ഞ് കുട്ടികൾ അണിനിരന്നു. നിശ്ചല ദൃശ്യങ്ങൾ, മുത്തുക്കുടകൾ, കോൽക്കളി , യോഗ് ചാപ് , ഉറിയടി എന്നിവയും ശോഭായാത്രക്ക് മാറ്റ് കൂട്ടി.മഞ്ഞപ്പട്ടുടയാടയണിഞ്ഞ് പീലിത്തിരുമുടി കെട്ടി ഓടക്കുഴലുമായി കൃഷ്ണവേഷം ധരിച്ച കുട്ടികൾ ആനന്ദ നൃത്തമാടി.നേരത്തെ ഗോപൂജ, ഭജന സന്ധ്യ, ഉറിയടി , കൃഷ്ണഗാഥ സദസ് എന്നിവ നടന്നിരുന്നു. ശോഭയാത്രയിൽ ഉണ്ണിക്കണ്ണൻമാർ , പൗരാണിക വേഷങ്ങളടങ്ങിയ നിശ്ചല ദൃശ്യങ്ങൾ , വാദ്യമേളങ്ങൾ, ഗോപിക നൃത്തം, യോഗ് ചാപ് എന്നിവയും ഉണ്ടായിരുന്നു.’അകലട്ടെ ലഹരി ഉണരട്ടെ മൂല്യവും ബാല്യവും ‘
എന്ന സന്ദേശമുണർത്തിയാണ് ബാലഗോകുലം ആഘോഷങ്ങൾ സംഘടിപ്പിച്ചത്. ലഹരിക്കെതിരായ ബോധവൽക്കരണ പ്രവർത്തനങ്ങൾക്ക് തുടക്കം കുറിച്ചു കൊണ്ട് ശോഭായാത്രകളുടെ ഉദ്ഘാടന സഭയിൽ ലഹരി വിരുദ്ധ പ്രതിജ്ഞ കുട്ടികൾ ഏറ്റുചൊല്ലി.പാനൂർ മേഖലയിൽ ഗ്രാമ നഗര പ്രദേശങ്ങളിലായി 7 ശോഭയാത്രകൾ നടന്നു.ചൊക്ലി – കരിയാട് മേഖലയിൽ നടന്ന ശോഭായാത്ര
പടന്നക്കരയിൽ നിന്ന് ആരംഭിച്ച് പള്ളിക്കുനി, നാരായണൻപറമ്പ് വഴി ഒളവിലം തൃക്കണ്ണാപുരം ശ്രീകൃഷ്ണ ക്ഷേത്രത്തിൽ സമാപിച്ചു.ശോഭാ യാത്ര കെ ശ്രീധരൻ മാസ്റ്റർ ഉദ്ഘാടനം ചെയ്തു.മാഹിയിൽ ചെമ്പ്ര സുബ്രഹ്മണ്യക്ഷേത്രത്തില്‍ നിന്ന് ആരംഭിച്ച ശോഭായാത്ര ഇരട്ടപിലാക്കൂല്‍ ശ്രീകൊയ്യോട്ട് പുത്തനമ്പലം ശാസ്താക്ഷേത്രത്തില്‍ സമാപിച്ചു.അശ്വിൻ അഭിലാഷ് ഉദ്ഘാടനം ചെയ്തു.
പെരിങ്ങളം-പന്ന്യന്നൂർ മേഖലയിൽ നടന്ന ശോഭായാത്ര
കീഴ്‌മാടം ഗുരുദേവ മഠത്തിൽ നിന്ന് ആരംഭിച്ച് വലിയാണ്ടി പീടിക – പൂക്കോം – മേലേപൂക്കോം വഴി കണ്ണംവെള്ളി തെരു ശിവക്ഷേത്രത്തിൽ സമാപിച്ചു. പി. ഗംഗാധരൻ ഉദ്ഘാടനം ചെയ്തു.പാനൂർ, എലാങ്കോട് മേഖലയിൽ നടന്ന ശോഭായാത്ര കൂറ്റേരി വൈരിഘാതക ക്ഷേത്രത്തിൽ നിന്ന് തുടങ്ങി എലാങ്കോട് മഹാവിഷ്ണു ക്ഷേത്രത്തില്‍ സമാപിച്ചു.എൻ.സി.ആർ. രാജലക്ഷ്മി ടീച്ചർ ഉദ്ഘാടന കർമ്മം നിർവഹിച്ചു.പൊയിലൂർ, വിളക്കോട്ടൂർ , ചെറമ്പ് മേഖലയിൽ നടന്ന ശോഭായാത്ര ചെറുപ്പറമ്പ് നിന്നും ആരംഭിച്ച് വടക്കെ പൊയിലൂർ വഴി പൊയിലൂർ ശ്രീ സരസ്വതി വിദ്യാ പീഠം സ്കൂൾ പരിസരം സമാപിച്ചു.പുത്തൂർ, തൃപ്പങ്ങോട്ടൂർ മേഖലയിൽ നടന്ന ശോഭായാത്ര പുത്തൂര്‍ പോസ്റ്റോഫീസ് പരിസരത്തുനിന്ന് ആരംഭിച്ച് പാറാട് ടൗണ്‍വഴി കുന്നോത്ത്പറമ്പില്‍ സമാപിച്ചു.പാട്യം, മൊകേരി മേഖലയിൽ നടന്ന ശോഭായാത്ര പത്തായക്കുന്ന് ടൗണില്‍ നിന്നും ആരംഭിച്ച് കുനുമ്മലില്‍ സമാപിച്ചു.
വിവിധ സ്ഥലങ്ങളിൽ നടന്ന ശോഭായാത്രകൾക്ക് കെ.സി.വിഷ്ണു, കെ.സുബീഷ്, ഇ. രാജേഷ്, സി.വി. ജസിത, കെ.പ്രകാശൻ , കെ.പി. ജിഗീഷ്, കെ.പി. പ്രജീഷ്, പി.പി.രജിൽ കുമാർ , അഡ്വ പ്രജീഷ്, വി.ആര്യപ്രഭ , അജയൻ പൊയിലൂർ, പ്രദീപ് ശ്രീലകം എന്നിവർ നേതൃത്വം നൽകി.
