മാഹി : മയ്യഴിയിലെ 33 ഓളം സർക്കാർ – സ്വകാര്യ വിദ്യാലയങ്ങളെ പങ്കെടുപ്പിച്ച് പള്ളൂർ പ്രിയദർശിനി യുവകേന്ദ്ര സംഘടിപ്പിക്കുന്ന സ്കൂൾ കലോത്സവമായ മയ്യഴി മേളം സീസൺ – 6ന് തിരശീല ഉയർന്നു.
പള്ളൂർ കസ്തൂർബാ ഗാന്ധി ഗവ.ഹൈസ്കൂളിലെ
4 വേദികളിലായി സേറ്റജിന കലോത്സവ മത്സരങ്ങളുടെ ഉദ്ഘാടനം രമേശ് പറമ്പത്ത് എം.എൽ.എ ഭദ്രദീപം കൊളുത്തി നിർവ്വഹിച്ചു.
അതോടപ്പം ഫോട്ടോഗ്രാഫറും ചിത്രകാരനുമായ ടി.കെ. ഗോപിനാഥൻ മാസ്റ്ററുടെ ഫോട്ടോ പ്രദർശനം വന്യജീവി ഫോട്ടോ ഗ്രാഫർ അസീസ് മാഹി ഉദ്ഘാടനം ചെയ്യുതു.
രണ്ടു ദിവസങ്ങളിലായി മോഹനം, കല്യാണി, ഭൈരവി, കാംബോജി എന്നീ വേദികളിലായി തിരുവാതിര, നാടോടി നൃത്തം, നാടൻ പാട്ട്, ഭരതനാട്യം, പ്രഛന്ന വേഷം, ശാസ്ത്രീയ സംഗീതം, ലളിതഗാനം മോണോ ആക്ട്, പദ്യം ചൊല്ലൽ, സിനിമാറ്റിക്ക് ഡാൻസ്, കരോക്കെ ഗാനം, ലാഫ് & ക്രൈ, മാപ്പിളപ്പാട്ട്, ഒപ്പന, സംഘഗാനം, ദേശഭക്തി ഗാനം, ആംഗ്യപ്പാട്ട്, കഥാകഥനം ഉൾപ്പെടെ പ്രീ പ്രൈമറി തലം മുതൽ ഹയർ സെക്കണ്ടറി തലം വരെയുള്ള 6 വിഭാഗങ്ങളിലായി 72 ഓളം ഇനങ്ങളിൽ 2000 ത്തിൽ പരം വിദ്യാർത്ഥികൾ പങ്കെടുക്കുന്നുണ്ട്. ഓരോ വിഭാഗത്തിലും കൂടുതൽ പോയന്റ് നേടുന്ന സ്കൂളിന് ചാമ്പ്യൻഷിപ്പും കുട്ടികൾക്ക് കലാതിലകം, കലാപ്രതിഭ പുരസ്ക്കാരവും നൽകും.
നവംബർ 30 ന് വൈകുന്നേരം 6 മണിക്ക് നടക്കുന്ന സമാപന സമ്മേളന ഉദ്ഘാടനവും സമ്മാനദാനവും പുതുച്ചേരി മുൻ അഭ്യന്തര മന്ത്രി ഇ.വത്സരാജ് നിർവ്വഹിക്കും. മാഹി പള്ളി റെക്ടർ റവ. ഫാ. സെബാസ്റ്റ്യൻ കാരക്കാട്ട്, മാഹി സി.ഇ.ഒ തനൂജ.എം.എം എന്നിവർ വിശിഷ്ഠാഥികളായിരിക്കും.
സംഘാടക സമിതി ഭാരവാഹികളായ സത്യൻ കോളോത്ത്, കെ.കെ.രാജീവ്, ഡോ.കെ. ചന്ദ്രൻ, കെ.വി.ഹരീന്ദ്രൻ, അലി അക്ബർ ഹാഷിം, സന്ദീവ്. കെ.വി എന്നിവർ നേതൃത്വം നൽകി.
