മാഹി: മയ്യഴി വിമോചന സമരത്തിൻ്റെ 70ാം വാർഷിക ദിനാഘോഷം വിവിധ പരിപാടികളോടെ മാഹിയിൽ ആഘോഷിച്ചു. മയ്യഴിയുടെ ഇതിഹാസ സമരത്തിന്റെയും സ്വാതന്ത്ര്യ സമരത്തിൻ്റെയും ഓർമ്മകൾ പുതുക്കുവാൻ ഐ.കെ. കുമാരൻ മാസ്റ്റർ സ്‌മാരക മന്ദിരത്തിന്റെ
ആഭിമുഖ്യത്തിലാണ് മാഹി സ്റ്റാച്ച്യു ജംഗ്ഷനിൽ പുഷ്പാർച്ചനയും തുടർന്ന് സ്‌മാരക സ്തൂപത്തിലേക്ക് അനുസ്മരണ മാർച്ചും സംഘടിപ്പിച്ചത്.
മയ്യഴിക്ക് സ്വാതന്ത്ര്യം നേടിതന്ന ധീര രക്തസാക്ഷികളെ അനുസ്മരിച്ച്
സ്റ്റാച്യു ജംഗ്ഷനിലെ മഹാത്മാഗാന്ധി, ഐ.കെ.കുമാരൻ, സി.ഇ.ഭരതൻ എന്നിവരുടെ പ്രതിമയിൽ പുഷ്പാർച്ചന നടത്തി. തുടർന്ന് മുൻ നഗരസഭ വൈസ് ചെയർമാൻ പി.പി.വിനോദ് കൈമാറിയ പതാക കീഴന്തൂർ പത്മനാഭൻ്റെ നേതൃത്വത്തിൽ ഏറ്റുവാങ്ങി വിമോചന സമര സേനാനികളുടെ സ്‌മാരക സ്തൂപത്തിലേക്ക് മാർച്ചും പുഷ്പാർച്ചനയും നടത്തി. അനുസ്മരണ യോഗത്തിൽ കീഴന്തുർ പത്മനാഭൻ അദ്ധ്യക്ഷത വഹിച്ചു. ഐ.അരവിന്ദൻ, സത്യൻ കോളോത്ത്, പി.പി.വിനോദ്, കെ.ഹരീന്ദ്രൻ, കെ.മോഹനൻ, ടി.എം.സുധാകരൻ, കെ.വി.ഹരീന്ദ്രൻ, എം.എ.കൃഷ്ണൻ, പി.കെ.ശ്രീധരൻ മാസ്റ്റർ, കെ.എം.പവിത്രൻ സംസാരിച്ചു.
