പള്ളൂരിലെ കുടിവെള്ള പ്രതിസന്ധി: അടിയന്തര ഇടപെടൽ ആവശ്യപ്പെട്ട് ടി.വി.കെ രംഗത്ത്.
മാഹി: പള്ളൂരിലെ പെട്രോൾ പമ്പുമായി ബന്ധപ്പെട്ട് പ്രദേശവാസികൾ നേരിടുന്ന കുടിവെള്ള പ്രശ്നത്തിന് ശാശ്വത പരിഹാരം കാണണമെന്ന് ആവശ്യപ്പെട്ട് തമിഴക വെട്രി കഴകം (ടി.വി.കെ) മാഹി ഘടകം രംഗത്ത്. വിഷയത്തിൽ അടിയന്തര ഇടപെടൽ ആവശ്യപ്പെട്ട് ടി.വി.കെ ഭാരവാഹികൾ മാഹി റീജിയണൽ അഡ്മിനിസ്ട്രേറ്റർക്ക് നിവേദനം നൽകി.
നിലവിൽ ലഭിച്ചുകൊണ്ടിരിക്കുന്ന ജലവിതരണം താൽക്കാലികം മാത്രമാണെന്നും ഇത് പ്രദേശവാസികൾക്ക് വലിയ ബുദ്ധിമുട്ടുകൾ സൃഷ്ടിക്കുന്നുണ്ടെന്നും നാട്ടുകാർ പരാതിപ്പെടുന്നു. ജനങ്ങൾ അനുഭവിക്കുന്ന ഈ ദുരിതത്തിന് എത്രയും വേഗം ശാശ്വതമായ പരിഹാരം കാണണമെന്ന് നിവേദനത്തിൽ ആവശ്യപ്പെട്ടു. വിഷയത്തിൽ ഉചിതമായ തുടർനടപടികൾ സ്വീകരിക്കുമെന്ന് റീജിയണൽ അഡ്മിനിസ്ട്രേറ്റർ ഉറപ്പുനൽകിയതായി ഭാരവാഹികൾ അറിയിച്ചു.
റീജിയണൽ അഡ്മിനിസ്ട്രേറ്റർക്ക് പുറമെ മാഹി എം.എൽ.എയ്ക്കും മാഹി ഗവ. ആശുപത്രി ഡെപ്യൂട്ടി ഡയറക്ടർക്കും (ഡി.ഡി) വിഷയം ചൂണ്ടിക്കാട്ടി നിവേദനം കൈമാറിയിട്ടുണ്ട്. ടി.വി.കെ മാഹി ഘടകം പ്രസിഡന്റ് പ്രിജേഷ്, പാർട്ടി പ്രവർത്തകരായ നിരഞ്ജൻ, വൈശാഖ്, ആദിഷ് എന്നിവർ നിവേദനം നൽകുന്നതിന് നേതൃത്വം നൽകി.