എടക്കാട് തൈലക്കണ്ടി കുടുംബത്തിന്റെ 'സ്മൃതി സംഗമം' ചരിത്രമായി:-

എടക്കാട് തൈലക്കണ്ടി കുടുംബത്തിന്റെ 'സ്മൃതി സംഗമം' ചരിത്രമായി:-

എടക്കാട്: നൂറ്റാണ്ടുകളുടെ പാരമ്പര്യവും ചരിത്രവും പേറുന്ന എടക്കാട് തൈലക്കണ്ടി കുടുംബത്തിന്റെ സ്മൃതി സംഗമം സ്നേഹത്തിന്റെയും ഒത്തൊരുമയുടെയും മനോഹരമായ മുഹൂർത്തങ്ങളോടെ തൈലക്കണ്ടി തറവാട്ടു മുറ്റത്ത് നടന്നു. തലമുറകളുടെ സ്മരണകളും പുതിയ തലമുറയുടെ ആവേശവും കൊണ്ട് കുടുംബ സംഗമം ചരിത്രത്തിലെ സുവർണ്ണ ഏടായി മാറി.

നൂറുകണക്കിന് കുടുംബാംഗങ്ങൾ സംഗമത്തിൽ പങ്കെടുത്തു. 

കുടുംബസംഗമത്തിൽ പങ്കെടുത്ത മുഴുവൻ അംഗങ്ങളും പ്രത്യേകം തയ്യാറാക്കിയ 'ഓർമ്മച്ചുവരിൽ' ഒപ്പുവെച്ചാണ് വേദിയിലേക്ക് പ്രവേശിച്ചത്. മുതിർന്ന അംഗം സക്കീന ആദ്യ ഒപ്പ് ചാർത്തി. കുടുംബസംഗമത്തിന്റെ കൺവീനർ തൈലക്കണ്ടി ഷഫീഖ് സ്വാഗതം പറഞ്ഞു. ടി.സി. ബഷീർ അധ്യക്ഷത വഹിച്ച ചടങ്ങിൽ ഷാഹിർ സ്വാഗതം ആശംസിച്ചു. ടി. ഷാഹുൽ ഹമീദ് കുടുംബത്തിന്റെ ചരിത്രവും അവതരിപ്പിച്ചു. കഴിഞ്ഞകാലങ്ങളിൽ വിടപറഞ്ഞുപോയ മുൻതലമുറയിലെ പ്രിയപ്പെട്ടവരെ ചടങ്ങിൽ അനുസ്മരിച്ചു.

സ്ത്രീകളുടെ ബഡായി വർത്തമാനവും,തൽസമയ ക്യാഷ് പ്രൈസ് നൽകിയുള്ള ചോദ്യോത്തര മത്സരങ്ങളും നടന്നു. കുടുംബത്തിലെ മുതിർന്ന അംഗങ്ങളെ ആദരിച്ചുകൊണ്ട് നടത്തിയ 'ആദരണീയം' ചടങ്ങും, പുതുതായി കുടുംബത്തിലേക്ക് കടന്നുവന്ന പുതിയാപ്ലമാരുമായുള്ള സംവാദവും, തറവാട്ടിലെ അമ്മായിമാർ അണിനിരന്ന 'അമ്മായി പോരും' ചടങ്ങിന് മാറ്റുകൂട്ടി.

അഷ്ഫാക്, ഫിദ എന്നിവരുടെ നേതൃത്വത്തിൽ ഒപ്പന, മാപ്പിളപ്പാട്ട്, ഗ്രൂപ്പ് ഡാൻസ്, വിവിധ കായിക മത്സരങ്ങൾ എന്നിവ അരങ്ങേറി. ഷാഹുൽ ഹമീദ് രചിച്ച കുടുംബ ഗാനം ഏവരും ചേർന്ന് ആലപിച്ചു. എല്ലാവരും ഒന്നിച്ച് എടുത്ത മെഗാ ഫാമിലി ഫോട്ടോയും കേക്ക് മുറിക്കലും ചടങ്ങിന്റെ മാറ്റ് കൂട്ടി. മത്സരങ്ങളിൽ വിജയികൾക്കുള്ള സമ്മാനവിതരണത്തോടെ സംഗമം സമാപിച്ചു.