സോഷ്യൽ മീഡിയ ഇൻഫ്ളുവൻസർ ശിവത്തിൽ അനൂപ് വാഹനഅപകടത്തിൽ മരിച്ചു..
കണ്ണൂരിലെ പ്രമുഖ വ്ലോഗറായ ചാലാട് സ്വദേശി അനൂപ്(33) വാഹനാപകടത്തിൽ മരിച്ചു. മാഹിയിലെ പള്ളിപ്പെരുന്നാൾ ചിത്രീകരിക്കാന്‍ സുഹൃത്തുമൊത്ത് പോകുമ്പോഴാണ് അപകടം. നടാലില്‍ ദേശീയപാതയില്‍ വച്ച് നിയന്ത്രണം വിട്ട് പാഞ്ഞെത്തിയ കാര്‍ അനൂപും സുഹൃത്ത് ഷബീറും സഞ്ചരിച്ച ബൈക്കില്‍ ഇടിച്ചാണ് അപകടമുണ്ടായത്.
നിയന്ത്രണം വിട്ട കാര്‍ ഡിവൈഡറില്‍ ഇടിച്ചശേഷം ബൈക്കില്‍ തട്ടുകയും അനൂപും ഷബീറും സര്‍വീസ് റോഡില്‍ നിര്‍ത്തിയിട്ട ബൈക്കിന് മുകളിലേക്ക് തെറിച്ച് വീഴുകയുമായിരുന്നു. അപകടം സംഭവിച്ചതിന് പിന്നാലെ ആശുപത്രിയിൽ എത്തിച്ചുവെങ്കിലും ജീവന്‍ രക്ഷിക്കാനായില്ല. ഗുരുതരമായി പരുക്കേറ്റ ഷബീര്‍ സ്വകാര്യ ആശുപത്രിയില്‍ ചികില്‍സയിലാണ്. സമൂഹമാധ്യമങ്ങളില്‍ സജീവമായിരുന്ന അനൂപ് പൊതുപ്രശ്നങ്ങള്‍ അവതരിപ്പിച്ചും ശ്രദ്ധേയനായിരുന്നു.