ഓസോൺ സംരക്ഷണവും കാലാവസ്ഥാ പ്രവർത്തനവും; മാഹിയിൽ ശിൽപ്പശാല

മാഹി: ലോക ഓസോൺ ദിനാചരണത്തിന്റെ ഭാഗമായി ‘തണുപ്പേറിയ ഭൂമിക്കായി ഓസോൺ സംരക്ഷണവും കാലാവസ്ഥാ പ്രവർത്തനവും’ എന്ന വിഷയത്തിൽ ശേഷിവികസന ശിൽപ്പശാല മാഹി മഹാത്മാഗാന്ധി ഗവൺമെന്റ് ആർട്സ് കോളേജിൽ സംഘടിപ്പിച്ചു. പുതുച്ചേരി മലിനീകരണ നിയന്ത്രണ സമിതിയുടെയും പുതുച്ചേരി EIACP പി.സി. ഹബ്ബിന്റെയും സഹകരണത്തോടെ കോളേജിലെ പി.ജി. ബോട്ടണി വിഭാഗമാണ് പരിപാടി സംഘടിപ്പിച്ചത്.
കോളേജ് പ്രിൻസിപ്പൽ ഡോ. കെ.കെ. ശിവദാസൻ അധ്യക്ഷനായി. മാഹി എംഎൽഎ അഡ്വ. ടി. അശോക് കുമാർ ഉദ്ഘാടനം ചെയ്തു. ബോട്ടണി വിഭാഗം മേധാവിയും പ്രോഗ്രാം കോഓർഡിനേറ്ററുമായ ഡോ. ജി. പ്രദീപ് കുമാർ സ്വാഗതം പറഞ്ഞു. ഇംഗ്ലീഷ് വിഭാഗം അസിസ്റ്റന്റ് പ്രൊഫസറും പി.ടി.എ. സെക്രട്ടറിയുമായ ഷിജിത്ത് ടി. ആശംസ നേർന്നു. ബോട്ടണി വിഭാഗം അസിസ്റ്റന്റ് പ്രൊഫസർ ഡോ. കെ. ശശികല നന്ദി പറഞ്ഞു.
തുടർന്ന് നടന്ന സാങ്കേതിക സെഷനുകളിൽ കാലിക്കറ്റ് സർവകലാശാല പരിസ്ഥിതി ശാസ്ത്ര വിഭാഗം മേധാവിയും റിസർച്ച് ഡയറക്ടറുമായ പ്രൊഫ. (ഡോ.) സി.സി. ഹരിലാൽ, ഗുരുവായൂർ ശ്രീകൃഷ്ണ കോളേജ് ഫിസിക്സ് വിഭാഗം അസോസിയേറ്റ് പ്രൊഫസർ ഡോ. നിഷാന്ത് ടി., മാഹി മഹാത്മാഗാന്ധി ഗവൺമെന്റ് ആർട്സ് കോളേജ് സുവോളജി വിഭാഗം അസോസിയേറ്റ് പ്രൊഫസറും ഐക്യുഎസി കോഓർഡിനേറ്ററുമായ ഡോ. കെ.എം. ഗോപിനാഥൻ എന്നിവർ വിവിധ വിഷയങ്ങളിൽ ക്ലാസുകൾ നയിച്ചു.
അന്തരീക്ഷത്തിന്റെ പരിണാമം, ഓസോൺ പാളിയുടെ പ്രാധാന്യം, അന്തരീക്ഷ ഓസോണിന്റെ രസതന്ത്രം, വായുഗുണനിലവാരം, പരിസ്ഥിതി ആഘാതങ്ങൾ, ഓസോൺ ശോഷണം ജൈവവൈവിധ്യത്തെ ബാധിക്കുന്ന വിധം, പ്രതിരോധ നടപടികൾ തുടങ്ങിയ വിഷയങ്ങൾ ശിൽപ്പശാലയിൽ ചർച്ച ചെയ്തു. സംവാദവും അഭിപ്രായശേഖരണവും വാലഡിക്ടറി സെഷനും നടന്നു.