പിൻവാതിൽ നിയമനങ്ങൾ നിരോധിച്ച് പുതുച്ചേരി സർക്കാർ ഉത്തരവ്; ലംഘിച്ചാൽ കർശന നടപടി

പുതുച്ചേരി: സർക്കാർ വകുപ്പുകളിലും പൊതുമേഖലാ-സ്വയംഭരണ സ്ഥാപനങ്ങളിലും നിയമങ്ങളും ചട്ടങ്ങളും ലംഘിച്ചുകൊണ്ടുള്ള പിൻവാതിൽ നിയമനങ്ങൾ പൂർണ്ണമായി നിരോധിച്ച് പുതുച്ചേരി സർക്കാർ അടിയന്തര സർക്കുലർ പുറപ്പെടുവിച്ചു. നിയമവിരുദ്ധമായി ആളുകളെ നിയമിക്കുന്നവർക്കെതിരെ കർശന നടപടി സ്വീകരിക്കുമെന്ന് സർക്കാർ വ്യക്തമാക്കുന്നു.

എംപ്ലോയ്‌മെന്റ് ഓഫീസിൽ രജിസ്റ്റർ ചെയ്ത അർഹരായ ഉദ്യോഗാർത്ഥികളെ അവഗണിച്ച്, പാർട്ടി അംഗങ്ങൾക്കും അനുയായികൾക്കും സർക്കാർ ജോലികൾ കൈമാറുന്നു എന്ന ആക്ഷേപങ്ങൾക്കിടയിലാണ് ഭരണപരിഷ്കാര വകുപ്പിന്റെ ഈ നിർണായക നീക്കം.പൊതുമരാമത്ത് വകുപ്പ് അവകാശികളുടെ സംഘടന നൽകിയ കോടതിലക്ഷ്യ ഹർജി പരിഗണിക്കവെ, പുതുച്ചേരിയിലെ എല്ലാ പൊതുസേവന നിയമനങ്ങളും ഭരണഘടനയ്ക്കും നിലവിലുള്ള നിയമങ്ങൾക്കും അനുസൃതമായി മാത്രമേ നടത്താവൂ എന്ന് മദ്രാസ് ഹൈക്കോടതി ഉത്തരവിട്ടിരുന്നു. ഇതേതുടർന്ന്, ഇനി മുതൽ പിൻവാതിൽ നിയമനങ്ങൾ നടത്തില്ലെന്ന് കഴിഞ്ഞ ജനുവരിയിൽ പുതുച്ചേരി സർക്കാർ കോടതിയിൽ സത്യവാങ്മൂലം സമർപ്പിച്ചിരുന്നു. ഇതിന്റെ പശ്ചാത്തലത്തിലാണ് ഇപ്പോൾ പുതിയ സർക്കുലർ ഇറക്കിയിരിക്കുന്നത്.

എല്ലാ പൊതുസേവന നിയമനങ്ങളും കൃത്യമായി വിജ്ഞാപനം ചെയ്ത ചട്ടങ്ങൾക്കും ഭരണഘടനയ്ക്കും അനുസൃതമായി മാത്രമേ നടത്താവൂ എന്നും പതിവ് ഒഴിവുകളിലേക്ക് മാത്രമായി നിയമനങ്ങൾ പരിമിതപ്പെടുത്തണമെന്നും സർക്കുലറിൽ വ്യക്തമാക്കുന്നു. നിയമനങ്ങളുമായി ബന്ധപ്പെട്ട ഫയലുകൾ കൈകാര്യം ചെയ്യുന്ന ഉദ്യോഗസ്ഥർക്ക് ഈ നടപടിക്രമങ്ങൾ കൃത്യമായി പാലിക്കപ്പെടുന്നുണ്ടെന്ന് ഉറപ്പാക്കാനുള്ള വ്യക്തിപരമായ ഉത്തരവാദിത്തം ഉണ്ടായിരിക്കും. നിയമവിരുദ്ധ നിയമനങ്ങളിൽ പങ്കുണ്ടെന്ന് കണ്ടെത്തിയാൽ ബന്ധപ്പെട്ട ഉദ്യോഗസ്ഥർക്കെതിരെ കർശനമായ അച്ചടക്ക നടപടികൾ സ്വീകരിക്കും.

എല്ലാ സർക്കാർ വകുപ്പുകളുടെയും, പൊതുമേഖലാ-തദ്ദേശ സ്വയംഭരണ സ്ഥാപനങ്ങളുടെയും മേധാവികൾ പുതിയ നിയമന ഫയലുകൾ കൈകാര്യം ചെയ്യുമ്പോൾ ഈ ഉത്തരവ് കർശനമായി പാലിക്കണമെന്ന് ഭരണപരിഷ്കാര വകുപ്പ് അറിയിച്ചു.