തട്ടഞ്ചാവടി ഉപതിരഞ്ഞെടുപ്പിൽ 80.81 ശതമാനം പോളിങ്

പുതുച്ചേരി: തട്ടഞ്ചാവടി നിയമസഭാ മണ്ഡലത്തിൽ നടന്ന ഉപതിരഞ്ഞെടുപ്പിൽ 80.81 ശതമാനം പോളിങ് രേഖപ്പെടുത്തി. ചൊവ്വാഴ്ച രാവിലെ ആരംഭിച്ച വോട്ടെടുപ്പ് വൈകിട്ട് ആറിന് സമാപിച്ചു. 26,921 വോട്ടർമാരിൽ 80 ശതമാനത്തിലധികം പേർ വോട്ട് രേഖപ്പെടുത്തി.

പുതുച്ചേരി മുഖ്യമന്ത്രി എൻ. രംഗസാമി കഴിഞ്ഞ നിയമസഭാ തിരഞ്ഞെടുപ്പിൽ തട്ടഞ്ചാവടിയിലും മംഗളത്തിലും മത്സരിച്ച് വിജയിച്ചിരുന്നു. മംഗളം മണ്ഡലം നിലനിർത്തുന്നതിനായി തട്ടഞ്ചാവടി സീറ്റ് രാജിവച്ചതോടെയാണ് ഇവിടെ ഉപതിരഞ്ഞെടുപ്പ് വേണ്ടിവന്നത്.

എൻ.ആർ. കോൺഗ്രസ് സ്ഥാനാർഥി അശോക് ആനന്ദ്, കോൺഗ്രസ് സ്ഥാനാർഥി ഇ. വിനായകം, ഡി.എം.കെ സ്ഥാനാർഥി കെ. സേതു സെൽവം, സി.പി.ഐ സ്ഥാനാർഥി എ.എം. സലീം എന്നിവരടക്കം 11 പേരാണ് മത്സരിച്ചത്.

മണ്ഡലത്തിൽ 12,575 പുരുഷന്മാരും 14,341 സ്ത്രീകളും അഞ്ച് ട്രാൻസ്‌ജെൻഡർ വോട്ടർമാരുമാണുള്ളത്. 31 പോളിങ് സ്റ്റേഷനുകളിലായിരുന്നു വോട്ടെടുപ്പ്.

രാവിലെ ഒമ്പതിന് 19.20 ശതമാനമായിരുന്ന പോളിങ് 11 മണിയോടെ 39.16 ശതമാനമായി. ഉച്ചയ്ക്ക് ഒന്നിന് 56.27 ശതമാനവും മൂന്നിന് 68.91 ശതമാനവും രേഖപ്പെടുത്തി. വൈകിട്ട് അഞ്ചിന് 78.83 ശതമാനമായിരുന്നു പോളിങ്. ഒടുവിൽ 80.81 ശതമാനത്തിൽ എത്തി.

85 വയസ്സിന് മുകളിലുള്ള 67 മുതിർന്ന വോട്ടർമാരുടെയും 40 ശതമാനത്തിലധികം വൈകല്യമുള്ള 37 ഭിന്നശേഷിക്കാരുടെയും വോട്ട് രേഖപ്പെടുത്തുന്നതിനായി തിരഞ്ഞെടുപ്പ് ഉദ്യോഗസ്ഥർ വീടുകളിലെത്തി സൗകര്യമൊരുക്കി.

വോട്ടെടുപ്പിന് ശേഷം എല്ലാ പോളിങ് സ്റ്റേഷനുകളിലെയും ഇ.വി.എം., വി.വി.പി.എ.ടി. മെഷീനുകൾ സുരക്ഷിതമായി സ്ട്രോങ് റൂമിലേക്ക് മാറ്റി. വോട്ടെണ്ണൽ ഒക്ടോബർ 9ന് നടക്കും