*പുതുച്ചേരിയിലെ സർക്കാർ സ്കൂളുകളിലെ 8, 9, 10 ക്ലാസ് വിദ്യാർത്ഥികൾക്കും ലാപ്‌ടോപ്പ് നൽകും: മുഖ്യമന്ത്രി എൻ. രംഗസാമി*
പുതുച്ചേരി: കേന്ദ്രഭരണ പ്രദേശമായ പുതുച്ചേരിയിലെ സർക്കാർ സ്കൂളുകളിൽ പഠിക്കുന്ന 8, 9, 10 ക്ലാസ് വിദ്യാർത്ഥികൾക്കും ലാപ്‌ടോപ്പുകൾ വിതരണം ചെയ്യുമെന്ന് മുഖ്യമന്ത്രി എൻ. രംഗസാമി പ്രഖ്യാപിച്ചു. ശിശുദിനാഘോഷച്ചടങ്ങിൽ സംസാരിക്കുകയായിരുന്നു അദ്ദേഹം.
നിലവിൽ സർക്കാർ സ്കൂളുകളിലെ 11-ാം ക്ലാസ് വിദ്യാർത്ഥികൾക്ക് എല്ലാ വർഷവും ലാപ്‌ടോപ്പുകൾ വിതരണം ചെയ്യുന്നുണ്ട്. ഇതിന്റെ തുടർച്ചയായാണ് 8, 9, 10 ക്ലാസുകളിലെ വിദ്യാർത്ഥികൾക്കും ലാപ്‌ടോപ്പുകൾ നൽകാൻ സർക്കാർ തീരുമാനിച്ചിരിക്കുന്നത്. പദ്ധതി ഉടൻ നടപ്പിലാക്കുമെന്നും മുഖ്യമന്ത്രി വ്യക്തമാക്കി.
സർക്കാർ സ്കൂളുകളിലെ വിദ്യാഭ്യാസ നിലവാരം ഉയർത്തുന്നതിനായി വിവിധ പദ്ധതികൾ നടപ്പിലാക്കിവരികയാണ്. സ്വകാര്യ സ്കൂളുകൾക്ക് തുല്യമായ നിലവാരത്തിലേക്ക് സർക്കാർ സ്കൂളുകൾ മാറിക്കൊണ്ടിരിക്കുകയാണെന്നും ഈ വർഷം സർക്കാർ സ്കൂളുകളിൽ പഠിച്ച 37 വിദ്യാർത്ഥികൾ മെഡിക്കൽ പഠനത്തിന് പ്രവേശനം നേടിയതായും അദ്ദേഹം പറഞ്ഞു.
സർക്കാർ-എയ്ഡഡ് സ്കൂളുകളിലെ വിദ്യാർത്ഥികൾക്കും വിവിധ പദ്ധതികളുടെ ആനുകൂല്യങ്ങൾ ലഭ്യമാക്കുന്നുണ്ട്. എയ്ഡഡ് സ്കൂളുകളിലെ അധ്യാപകർക്ക് പ്രതിമാസ ശമ്പളം നൽകുന്നതിനുള്ള നടപടികളും സ്വീകരിച്ചിട്ടുണ്ടെന്ന് മുഖ്യമന്ത്രി അറിയിച്ചു.
പുതുച്ചേരി സ്കൂൾ വിദ്യാഭ്യാസ ഡയറക്ടറേറ്റിന്റെ ആഭിമുഖ്യത്തിൽ കരുവാടിക്കുപ്പം കാമരാജ് മണിമണ്ഡപത്തിൽ സംഘടിപ്പിച്ച ശിശുദിനാഘോഷം മുഖ്യമന്ത്രി ഉദ്ഘാടനം ചെയ്തു. വിദ്യാഭ്യാസ മന്ത്രി എ. നമചിവായം അധ്യക്ഷത വഹിച്ചു. ചടങ്ങിൽ മത്സരവിജയികളായ വിദ്യാർത്ഥികൾക്ക് മുഖ്യമന്ത്രി സമ്മാനങ്ങൾ വിതരണം ചെയ്തു. എം.പി. സു. സെൽവഗണപതി, എം.എൽ.എമാരായ സായ് ജെ. ശരവണൻകുമാർ, എ. അശോക് ആനന്ദ് തുടങ്ങിയവർ പങ്കെടുത്തു.