തെരഞ്ഞെടുപ്പ് കമ്മീഷണര് 48 മണിക്കൂറിനകം പദവി ഒഴിയണം; അല്ലാത്തപക്ഷം രാജ്യവ്യാപക പ്രക്ഷോഭമെന്ന് സിജെപി
മുഖ്യ തെരഞ്ഞെടുപ്പ് കമ്മീഷണര് ഗ്യാനേഷ് കുമാര് 48 മണിക്കൂറിനുള്ളില് രാജി സമര്പ്പിക്കണമെന്ന് ആവശ്യപ്പെട്ട് കോക്രോച്ച് ജനതാ പാര്ട്ടി (സിജെപി). അല്ലാത്തപക്ഷം രാജ്യവ്യാപകമായി ശക്തമായ പ്രക്ഷോഭങ്ങള് ആരംഭിക്കുമെന്ന് പാര്ട്ടി നേതൃത്വം മുന്നറിയിപ്പ് നല്കി. വരാനിരിക്കുന്ന എല്ലാ തെരഞ്ഞെടുപ്പുകളും താല്ക്കാലികമായി നിര്ത്തിവെക്കണമെന്നും എസ്ഐആര് നടപടികള് 2025 ലെ സ്ഥിതിയിലേക്ക് പുനഃസ്ഥാപിക്കണമെന്നും സിജെപി ആവശ്യപ്പെടുന്നു.
ഡല്ഹിയില് വാര്ത്താസമ്മേളനത്തിലാണ് സിജെപി നേതാക്കളായ അഭിജിത് ദീപ്കെ, സൗരവ് ദാസ്, അശുതോഷ് രങ്ക എന്നിവര് നിലപാട് വ്യക്തമാക്കിയത്. തെരഞ്ഞെടുപ്പ് കമ്മീഷണര്മാര്ക്കിടയിലെ അഭിപ്രായവ്യത്യാസങ്ങളെക്കുറിച്ച് ഇന്ത്യന് എക്സ്പ്രസ് നടത്തിയ അന്വേഷണ റിപ്പോര്ട്ട് പുറത്തുവന്നതിന് പിന്നാലെയാണ് ഡല്ഹിയില് വാര്ത്താസമ്മേളനം നടന്നത്. രാജ്യതലസ്ഥാനത്തും രാജ്യത്തുടനീളവും കുത്തിയിരിപ്പ് സമരങ്ങള് ഉള്പ്പെടെയുള്ള പ്രതിഷേധങ്ങള് സംഘടിപ്പിക്കുമെന്ന് സിജെപി സ്ഥാപകനും കണ്വീനറുമായ ദീപ്കെ മാധ്യമപ്രവര്ത്തകരോട് പറഞ്ഞു.
പാര്ട്ടിയുടെ ഭാഗത്തുനിന്ന് മൂന്ന് പ്രധാന ആവശ്യങ്ങളാണ് കോ-കണ്വീനര് സൗരവ് ദാസ് മുന്നോട്ടുവെച്ചത്. മുഖ്യ തെരഞ്ഞെടുപ്പ് കമ്മീഷണറുടെ രാജി, ഗ്യാനേഷ് കുമാറിനും അദ്ദേഹത്തിന് നിര്ദ്ദേശം നല്കിയവര്ക്കുമെതിരെ ക്രിമിനല് നടപടികള് സ്വീകരിക്കുക, വരാനിരിക്കുന്ന എല്ലാ തെരഞ്ഞെടുപ്പുകളും മരവിപ്പിക്കുക എന്നിവയാണ് പ്രധാന ആവശ്യങ്ങള്, ഇതിനുപുറമെ, എസ്ഐആര് സംബന്ധിച്ച ഫയലുകള് സുപ്രീംകോടതിയുടെ നേതൃത്വത്തിലുള്ള സമിതിയുടെ കസ്റ്റഡിയില് സൂക്ഷിക്കണമെന്നും, തെരഞ്ഞെടുപ്പ് കമ്മീഷണര്മാരുടെ നിയമനവുമായി ബന്ധപ്പെട്ട നിയമം റദ്ദാക്കണമെന്നും പാര്ട്ടി ആവശ്യപ്പെട്ടു.
തെരഞ്ഞെടുപ്പ് കമ്മീഷനുള്ളിലെ തീരുമാനങ്ങളിലും നടപടികളിലും കമ്മീഷണര്മാരായ സുഖ്ബീര് സിങ് സിന്ധുവും വിവേക് ജോഷിയും കുറഞ്ഞത് 14 തവണ വിയോജിപ്പ് രേഖപ്പെടുത്തിയിരുന്നു എന്ന റിപ്പോര്ട്ട് പുറത്തുവന്ന് ദിവസങ്ങള്ക്ക് ശേഷമാണ് ഈ സംഭവവികാസങ്ങള്. എന്നാല് വ്യത്യസ്ത അഭിപ്രായങ്ങളും എഴുതിനല്കിയ നിരീക്ഷണങ്ങളും ആഭ്യന്തര പരിശോധനകളും കമ്മീഷന്റെ പ്രവര്ത്തനങ്ങളുടെ സാധാരണ ഭാഗമാണെന്നും, എസ്ഐആര് ഉള്പ്പെടെ കഴിഞ്ഞ വര്ഷത്തെ എല്ലാ തീരുമാനങ്ങളും ഏകകണ്ഠമായിരുന്നുവെന്നുമാണ് തെരഞ്ഞെടുപ്പ് കമ്മീഷന് ഇതിനകം വ്യക്തമാക്കിയിട്ടുള്ളത്.